Trump: Pushtimi i Iranit do të ishte “humbje kohe”, ata “kanë humbur gjithçka”

Presidenti amerikan Donald Trump ka deklaruar se Iran “ka humbur gjithçka” në konfliktin e fundit dhe se, për momentin, nuk e sheh të nevojshëm një pushtim tokësor.

Duke komentuar zhvillimet në ditën e shtatë të përplasjes, Trump i quajti të kota deklaratat e ministrit të jashtëm iranian për gatishmërinë e vendit ndaj një ndërhyrjeje tokësore.

“Është humbje kohe. Ata kanë humbur marinën e tyre, kanë humbur gjithçka që mund të humbasin”, u shpreh ai, duke shtuar se ushtria amerikane ka mjaftueshëm municion për të vazhduar operacionet.

Trump foli gjithashtu për situatën politike në Iran pas vdekjes së liderit suprem Ali Khamenei gjatë sulmeve të përbashkëta SHBA–Izrael, duke theksuar se do të dëshironte që vendi të udhëhiqej nga një lider i ri që, sipas tij, “do të bënte një punë të mirë”.