VËLLAI I UNIKKATILIT, MENTOR PALOKAJ, GJETUR PA SHENJA JETE NË PRISHTINË

Një ngjarje tronditëse ka ndodhur sot në lagjen Arbëria të Prishtinës, ku është raportuar se një person është gjetur pa shenja jete në banesën e tij. Viktima, që mësohet të jetë vëllai i reperit të njohur Unikkatili, Mentor Palokaj, u gjet në orët e pasdites. Policia e Kosovës ka konfirmuar vdekjen e tij dhe ka deklaruar se ekipi mjekësor konstatoi vdekjen në vendngjarje.

Zëdhënësja e Policisë për rajonin e Prishtinës, Flora Ahmeti, tha për mediat se informacioni për rastin ishte pranuar rreth orës 18:00. “Sot rreth orës 18:00, kemi pranuar informatën për një person pa shenja jete në një banesë në lagjen Arbëria në Prishtinë,” ka thënë Ahmeti, duke shtuar se viktima ishte një mashkull i lindur në vitin 1983. “Vdekjen e të cilit e ka konstatuar ekipi mjekësor në vendngjarje.”

Aktualisht, hetuesit e policisë janë në vendngjarje dhe po bashkëpunojnë me prokurorin për të zbardhur shkaqet e vdekjes. “Hetuesit policor në koordinim me prokurorin po ndërmarrin të gjitha veprimet e duhura që do t’i kontribuonin hetimit të ngjarjes,” ka shtuar Ahmeti.

Mentori, vëllai i reperit Unikkatili, ishte gjithashtu një figurë e njohur në skenën muzikore, i njohur me nofkën “Tee” si pjesë e grupit TBA. Ai dhe Unikkatili kanë realizuar disa hite, të cilat mbeten të pavdekshme për fansat dhe publikun, përfshirë këngët “Fjalët e pavdekshme”, “I Smut”, “Sun Um Prek”, “Jeta s’osht film” dhe “Na thej”.

Vdekja e Mentor Palokaj është konfirmuar edhe nga anëtari i grupit TBA, Kobra, i cili shpërndau një postim ngushëllimi në rrjetet sociale. Deri më tani, nuk është bërë ndonjë reagim nga familjarët ose të afërmit e tij në lidhje me këtë tragjedi.

Policia ka nisur hetimet dhe po punon për të zbuluar shkaqet e ngjarjes, ndërsa informacionet e mëtejshme pritet të dalin në ditët në vijim.