WILL SMITH NË QENDËR TË POLEMIKAVE VIDEO ME TURMË TË KRIJUAR NGA INTELIGJENCA ARTIFICIALE

Will Smith është bërë pjesë e një debati të madh publik pasi publikoi një video nga turneu i tij “Based on a True Story”, ku fansat pretendojnë se turma e paraqitur nuk është reale, por e krijuar me inteligjencë artificiale.

Klipi, i ngarkuar në kanalin zyrtar të aktorit dhe këngëtarit në YouTube, u cilësua “i sikletshëm” nga shumë ndjekës. Ata vunë re elemente të çuditshme si fytyra të turbullta, duar me gjashtë gishta dhe tabela me mbishkrime të pakuptimta, ndër të cilat njëra shkruante “FR6SH CRINCE”.

Në video shfaqeshin edhe pankarta me mesazhe emocionale për artistin, por gabimet teknike i bënë ndjekësit të dyshojnë se Smith ka përdorur turma të rreme. “Pse turma është e rreme?”, shkroi një komentues. Një tjetër shtoi: “Imagjino të jesh kaq i famshëm dhe të përdorësh AI për të krijuar fansa… tragjike”.

Reagimet në rrjetet sociale kanë qenë të shumta dhe të ashpra. Një pjesë e publikut e konsideron videon një përpjekje të dështuar për të tërhequr vëmendje, ndërsa të tjerë e shohin si një shenjë të krizës krijuese të Smith.

Megjithatë, aktori dhe këngëtari vazhdon të jetë aktiv në skenë. Ai publikoi këtë vit albumin e tij të parë pas më shumë se 20 vitesh dhe aktualisht është në një turne në Mbretërinë e Bashkuar, me shfaqje të planifikuara në Cardiff, Manchester, Londër dhe Wolverhampton.

Pavarësisht kritikave, Smith vijon të performojë me energji, duke sjellë nostalgji me hitet e tij më të njohura dhe duke ndarë momente të veçanta personale me publikun.