Bebe Rexha rikthehet tek rrënjët, “Çike, Çike” publikohet nesër dhe premton surpriza

Një lajm që ka ndezur menjëherë rrjetin: Bebe Rexha po vjen për herë të parë me një këngë në gjuhën shqipe. Artistja me origjinë shqiptare ka zbuluar se projekti i titulluar “Çike, Çike” do të publikohet nesër në orën 06:00 të mëngjesit, sipas orës së Kosovës, duke zgjedhur një orar simbolik që i jep edhe më shumë kuriozitet lançimit.

Kënga do të jetë pjesë e albumit të saj më të ri, Dirty Blonde, një projekt që pritet të vijë i plotë pas disa muajsh. Ndryshe nga pjesa tjetër e albumit, që do të jetë në anglisht, “Çike, Çike” shënon një moment të veçantë në karrierën e saj, pasi është hera e parë që Bebe sjell një këngë të plotë në shqip për publikun.

Që në momentin kur ajo paralajmëroi se do të këndonte në gjuhën amtare, fansat shqiptarë shpërthyen në entuziazëm. Artistja, e cila prej vitesh dominon tregun ndërkombëtar me hite globale, ka ruajtur gjithmonë lidhjen me origjinën, por ky projekt duket si një kthim i drejtpërdrejtë tek rrënjët.

Deri tani janë publikuar vetëm disa fragmente të shkurtra nga kënga, të cilat kanë mjaftuar për të rritur pritshmëritë. Ritmi energjik dhe atmosfera verore që përçojnë sekuencat e para sugjerojnë një hit potencial, që mund të bashkojë audiencën shqiptare me atë ndërkombëtare.

Me “Çike, Çike”, Bebe Rexha jo vetëm që zgjeron repertorin e saj, por edhe i jep një dhuratë të shumëpritur publikut shqiptar, i cili prej kohësh e ka kërkuar një projekt në gjuhën e tij nga ylli me famë botërore.