Incident para finales së madhe: tifozët “Dardanë” trazojnë natën e Turqisë me fishekzjarre pranë hotelit

Në prag të supersfidës mes Kosovës dhe Turqisë, një incident ka ndezur atmosferën edhe më shumë dhe ka shtuar tensionin para ndeshjes vendimtare.

Sipas raportimeve, tifozët “Dardanë” kanë hedhur fishekzjarre pranë hotelit ku është e akomoduar Kombëtarja e Turqisë, duke krijuar zhurmë të fortë dhe shqetësim për futbollistët mysafirë. Ngjarja ka ndodhur në orët e vona të natës, pikërisht në momentin kur lojtarët turq po tentonin të pushonin para përballjes që mund të vendosë fatin e kualifikimit.

Zhurmat e vazhdueshme nga fishekzjarret raportohet se kanë penguar ekipin turk të bëjë gjumë të qetë, duke sjellë reagime të ndryshme dhe duke e kthyer situatën në një temë të nxehtë në rrjetet sociale. Për disa, ky veprim është parë si një mënyrë për të prishur përqendrimin e kundërshtarit, ndërsa të tjerë e kanë konsideruar të papërshtatshëm dhe jashtë frymës sportive.

Atmosfera në kryeqytet është tashmë në kulm dhe duket se gjithçka po shkon drejt një nate të zjarrtë futbolli, ku emocioni ka kapluar jo vetëm tifozët, por edhe qytetin në tërësi.

Kujtojmë se sonte nga ora 20:45, në stadiumin “Fadil Vokrri” në Prishtinë, zhvillohet finalja e madhe e playoff-it për Kupën e Botës 2026 mes Kosovës dhe Turqisë, një duel që pritet të jetë vendimtar për të dyja kombëtaret dhe një nga ndeshjet më të rëndësishme në historinë e “Dardanëve”.