Noah Wyle shpallet mashkulli më seksi në botë për vitin 2026

Aktori amerikan Noah Wyle, i njohur për rolin e doktor Michael “Robby” Robinavitch në serialin e suksesshëm “The Pitt”, është shpallur “Sexiest Man Alive 2026” nga revista People. Në moshën 55-vjeçare, aktori merr një nga titujt më të komentuar të showbiz-it, në një periudhë kur karriera e tij po përjeton një tjetër kulm.

Lajmi e gjeti Wyle të papërgatitur. Në intervistën për People, ai tregoi se fillimisht mendoi se gjithçka ishte një shaka, pasi nuk e kishte imagjinuar kurrë se do të merrte këtë vlerësim. Bashkëshortja e tij, Sara Wells, e bindi ta pranonte me humor dhe krenari këtë titull.

Për publikun, Wyle nuk është një emër i ri. Ai u bë i njohur ndërkombëtarisht në vitet ’90 përmes serialit mjekësor “ER”, ku interpretoi doktor John Carter. Me “The Pitt”, aktori është rikthyer fuqishëm në ekran, duke fituar vëmendjen e një brezi të ri shikuesish.

Suksesi i tij nuk kufizohet vetëm te popullariteti. Wyle ka fituar çmime Emmy për interpretimin në “The Pitt”, ndërsa seriali është kthyer në një nga projektet më të rëndësishme të karrierës së tij. Përveç aktrimit, ai angazhohet edhe në nisma bamirësie dhe projekte që mbështesin komunitetet në nevojë.

Me humor, aktori pranoi se titulli i ri mund ta bëjë objekt shakaje mes miqve dhe familjarëve. Ai gjithashtu vlerësoi mbështetjen e bashkëshortes, duke theksuar se për të kanë rëndësi jo vetëm karriera, por edhe roli si bashkëshort dhe baba.

Pas emrave të njohur si Jonathan Bailey, Michael B. Jordan dhe George Clooney, këtë vit radha i takon Noah Wyle. Një vlerësim që bashkon nostalgjinë e fansave të “ER” me suksesin e një prej serialeve më të përfolura të momentit.