Albumi i P Diddy shtyhet papritur, ndërsa afrohet data e lirimit nga burgu

Publikimi i albumit të ri të P Diddy është shtyrë zyrtarisht me 10 ditë, duke rikthyer sërish vëmendjen te situata e tij ligjore dhe e ardhmja në industrinë e muzikës.

Ky vendim vjen vetëm disa javë pasi u bë e ditur se dënimi i reperit dhe producentit të njohur është reduktuar me më shumë se një muaj. Sipas të dhënave të fundit, P Diddy pritet të lirohet më 15 prill 2028.

Më herët, ai ishte planifikuar të dilte nga burgu më 25 prill 2028, ndërsa para kësaj date ishte përmendur edhe 4 qershori 2028. Ndryshimet e njëpasnjëshme në datën e lirimit kanë krijuar interes të madh në media, sidomos tani që emri i tij mbetet një nga më të përfolurit në showbiz-in amerikan.

P Diddy aktualisht po vuan një dënim prej 50 muajsh burg, pasi u shpall fajtor për dy akuza verën e kaluar, pas një gjyqi të zhvilluar në Nju Jork. Megjithatë, ai u shpall i pafajshëm për akuza më të rënda, që përfshinin trafikim për shfrytëzim seksual dhe komplot për të kryer shantazh, akuza që mund të kishin sjellë dënim të përjetshëm.

Para se të dënohej, ai kaloi rreth një vit në një qendër paraburgimi në Bruklin, pasi gjykata i refuzoi lirimin me kusht. Aktualisht, P Diddy ndodhet në FCI Fort Dix në New Jersey, një burg federal i vendosur në një bazë ushtarake.

Sipas raportimeve, ky transferim është kërkuar nga avokatët e tij, të cilët kanë argumentuar se Fort Dix ofron akses në programe rehabilitimi nga droga dhe është më pranë familjes së tij, duke e bërë më të lehtë procesin e rikuperimit dhe vizitat.

Në një deklaratë të mëparshme në dokumentet gjyqësore të tetorit 2025, avokatja Teny Geragos kishte theksuar se vendosja në këtë institucion do të ndihmonte P Diddy të përqendrohej në rehabilitim dhe të ruante lidhjet familjare gjatë kohës së dënimit.

Ndërkohë, shtyrja e albumit pritet të ngrejë më shumë pikëpyetje mbi planet e tij artistike dhe strategjinë që do të ndjekë, ndërsa publiku pret të shohë nëse rikthimi i tij në muzikë do të jetë po aq i fuqishëm sa dikur.