Nisma për Stenaldo Mëhillin : Hapet “GoFundMe” pas dhurimit të 10 mijë eurove

Nisma për t’i siguruar një shtëpi Stenaldo Mëhillit po merr gjithnjë e më shumë vëmendje dhe mbështetje, duke u kthyer në një nga fushatat më të komentuara humanitare të ditëve të fundit.

Vetëm pak ditë pasi biznesmeni Shaqir Palushi, themelues i fondacionit “Golden Eagle”, dhuroi 10 mijë euro dhe bëri një thirrje publike për ndihmë, tani është hedhur një tjetër hap i rëndësishëm. Është hapur zyrtarisht një fushatë në platformën ndërkombëtare “GoFundMe”, për të mbledhur fonde që do ta ndihmojnë Stenaldon të realizojë ëndrrën e tij për një strehë të sigurt.

Lajmin e ka bërë të ditur vetë Stenaldo përmes një postimi në Instagram, ku ka shprehur mirënjohjen e tij të thellë për të gjithë ata që e kanë mbështetur deri më tani. Ai theksoi se ndihma fillestare e Shaqir Palushit i dha një shtysë të fortë kësaj nisme, duke e bërë të mundur që ajo të marrë një dimension më të madh.

Në mesazhin e tij, Stenaldo ndau edhe një reflektim prekës dhe frymëzues për këdo që përballet me vështirësi në jetë, duke theksuar rëndësinë e pranimit të situatës dhe kërkimit të ndihmës:

“Në fund bindem që të pranosh vështirësitë, por edhe të kërkosh ndihmë, të bën thjesht të vërtetë. Ju jam mirënjohës, falënderues pa masë, për çdo kontribut.”

Tashmë, përmes linkut të publikuar në profilin e tij, çdo person mund të kontribuojë dhe të bëhet pjesë e kësaj nisme humanitare, duke ndihmuar Stenaldon që të ndërtojë një jetë më të qëndrueshme dhe të sigurojë një shtëpi ku të ndihet i mbrojtur.