Malbora Gurra reagon për herë të parë: “Ishte vendimi im”

Një tjetër largim i papritur ka trazuar dinamikat në Ferma VIP, këtë herë me protagoniste Malbora Gurra, emri i së cilës është kthyer menjëherë në një nga më të komentuarit në rrjet.

Përjashtimi i saj nga spektakli ka ngritur pikëpyetje të shumta mes publikut, por duket se vetë ish-fermerja ka zgjedhur të mos lërë vend për shumë aludime. Vetëm pak pas daljes, Malbora ka reaguar publikisht në Instagram, duke lënë të kuptohet se fundi i eksperiencës nuk ka qenë aq i papritur sa u duk në ekran.

Me një mesazh të gjatë dhe emocional, ajo falënderoi publikun për mbështetjen e marrë gjatë afro 40 ditëve në fermë, por ajo që tërhoqi më shumë vëmendje ishte një detaj i qartë: vendimi për ta mbyllur këtë kapitull, sipas saj, ka ardhur personalisht prej saj.

“Kam vendosur ta përfundoj këtë eksperiencë për arsye të mira…”, shkruan Malbora, pa zbuluar ende detaje, por duke premtuar se shumë shpejt do të tregojë gjithçka.

Deklarata e saj ka ndezur menjëherë debat në rrjet, pasi shumë ndjekës po pyesin nëse kemi të bëjmë me një përjashtim të zakonshëm nga produksioni, apo me një largim të negociuar që ka ardhur pas vendimit personal të konkurrentes.

Një fjali tjetër nga reagimi i saj po komentohet gjerësisht: “Vendimet dhe mënyrat për të përfunduar një bashkëpunim janë gjithmonë personale.” Një mesazh që për shumëkënd tingëllon si më shumë sesa një falënderim… dhe ndoshta si paralajmërim se prapaskenat e këtij largimi sapo kanë nisur të dalin në dritë.