Tragjedi në Leipzig – Makina futet mes turmës, dy të vdekur dhe disa të plagosur rëndë

Momente paniku dhe skena dramatike kanë tronditur qytetin e Leipzig, pasi një ngjarje e rëndë ka goditur një nga zonat më të frekuentuara tregtare të qytetit.

Sipas informacioneve paraprake, një shofer 33-vjeçar dyshohet se ka përplasur qëllimisht automjetin e tij mes qytetarëve që ndodheshin në zonë, duke shkaktuar një bilanc tragjik: dy persona kanë humbur jetën, ndërsa të paktën dy të tjerë po luftojnë për jetën në gjendje kritike.

Ngjarja ndodhi në aksin që lidh Augustusplatz me qendrën këmbësore të qytetit, një zonë që në orët e ditës mbushet me banorë, turistë dhe kalimtarë.

Forcat e policisë kanë ndërhyrë menjëherë, duke arrestuar autorin në vendngjarje, ndërsa ndaj tij kanë nisur hetimet për vrasje dhe tentativë vrasjeje.

Autoritetet gjermane bëjnë me dije se, bazuar në të dhënat paraprake, i dyshuari besohet të ketë vepruar i vetëm dhe aktualisht nuk konsiderohet të ketë rrezik të mëtejshëm për publikun.

Ngjarja ka rikthyer edhe një herë debatin mbi sigurinë në hapësirat urbane dhe sa të ekspozuara mbeten zonat publike ndaj sulmeve me automjete, një skenar që vitet e fundit ka alarmuar disa qytete evropiane.