“Shakira fiton gjyqin” – Gjykata spanjolle i jep fund betejës milionëshe me autoritetet tatimore

Shakira ka dalë fituese në një nga betejat më të bujshme ligjore që ka përjetuar vitet e fundit. Pas një përplasjeje të gjatë me autoritetet tatimore në Spain, këngëtarja ka marrë më në fund vendimin që i jep fund dramës gjyqësore që e ndoqi për vite me radhë.

Sipas ekipit të saj ligjor, Gjykata e Lartë Kombëtare e Spanjës vendosi plotësisht në favor të artistes, duke rrëzuar pretendimet e Agjencisë Spanjolle të Taksave. Në deklaratën për mediat, vendimi u cilësua si “fitore përfundimtare” për yllin latin.

Në qendër të debatit ishte pretendimi se Shakira kishte qëndruar më shumë se 183 ditë në Spanjë, çka do ta bënte automatikisht rezidente tatimore në vend. Por gjykata arriti në përfundimin se autoritetet nuk kishin prova të mjaftueshme për ta vërtetuar këtë.

Madje, në dokumentet e vendimit thuhet se sanksionet ndaj këngëtares ishin “në kundërshtim me ligjin”, një formulim që po komentohet gjerësisht në mediat ndërkombëtare.

Ekipi i Shakirës pretendon se artistja u vu padrejtësisht në shënjestër në një periudhë kur ishte vazhdimisht në lëvizje për shkak të turneut të saj botëror në vitin 2011. Vetëm gjatë atij viti, ajo realizoi 120 koncerte në 37 shtete, duke kaluar pjesën më të madhe të kohës jashtë Spanjës.

Pas gjithë tensioneve, gjobave dhe proceseve që mbajtën emrin e saj në titujt kryesorë për vite, duket se Shakira më në fund po mbyll një kapitull të vështirë të jetës së saj — dhe këtë herë, me fitore të plotë.