Fundi i një sage: Angelina dhe Brad mbyllin kapitullin më të gjatë të Hollywood-it
Written by radio wave on June 2, 2026
Një nga historitë më të bujshme të Hollywood-it duket se po i afrohet më në fund epilogut. Pas gati dhjetë vitesh përballjesh ligjore, tensione familjare dhe betejash publike, saga e divorcit mes Angelina Jolie dhe Brad Pitt po hyn në fazën e saj përfundimtare.
Një datë simbolike pritet të shënojë këtë kthesë të rëndësishme. Më 12 korrik, binjakët e ish-çiftit, Vivienne dhe Knox, mbushin 18 vjeç, duke i dhënë fund edhe çështjeve që lidhen me kujdestarinë e fëmijëve. Kjo konsiderohet si një nga pengesat e fundit ligjore që ka mbajtur të hapur procesin prej vitesh.
Ndarja e çiftit që dikur konsiderohej si “çifti i artë” i Hollywood-it nisi në vitin 2016, kur Angelina Jolie depozitoi kërkesën për divorc. Pas kësaj, marrëdhënia mes tyre u përfshi nga akuza të forta dhe një betejë e gjatë në gjykata.
Aktorja ka pretenduar se gjatë një udhëtimi me avion privat kishte pasur episode të papranueshme ndaj saj dhe fëmijëve, akuza që Brad Pitt i ka mohuar vazhdimisht. Megjithatë, çështja ka mbetur një nga temat më të diskutuara në mediat ndërkombëtare gjatë gjithë këtyre viteve.
Burime pranë familjes raportojnë se raportet mes Pitt dhe disa prej fëmijëve të tij mbeten të ftohta. Madje, disa prej tyre kanë zgjedhur ose po shqyrtojnë mundësinë të mos përdorin më mbiemrin e aktorit, një zhvillim që ka tërhequr vëmendjen e opinionit publik.
Por problemet mes dy yjeve nuk përfundojnë vetëm te familja. Ata vijojnë të përballen edhe për pasurinë e tyre të përbashkët, përfshirë vreshtarinë luksoze Chateau Miraval në Francë, një pronë që për vite me radhë simbolizoi historinë e tyre të dashurisë.
Së fundmi, Brad Pitt ka shënuar një fitore procedurale në këtë betejë ligjore, por konflikti për pronën mbetet ende i hapur.
Ndërsa kujdestaria e fëmijëve po del nga skena, mbetet për t’u parë nëse edhe mosmarrëveshjet financiare do të marrin fund. Një gjë është e sigurt: historia e Angelina Jolie dhe Brad Pitt do të mbetet një nga ndarjet më të përfolura dhe më të ndjekura në historinë e showbiz-it botëror.
