Bebe Rexha pushton Spotify-n: “Dirty Blonde” hyn mes albumeve më të dëgjuara në botë

Bebe Rexha po shijon një tjetër moment të artë në karrierën e saj. Ylli me origjinë shqiptare ka bërë një rikthim të fuqishëm në skenën muzikore ndërkombëtare, pasi albumi i saj më i ri, “Dirty Blonde”, është renditur ndër projektet më të dëgjuara në Spotify në nivel global.

Sipas të dhënave të publikuara nga platforma muzikore, albumi ka debutuar në vendin e tretë në listën e albumeve të reja më të dëgjuara në botë gjatë ditëve të para të publikimit, duke lënë pas shumë emra të njohur të industrisë.

Ky sukses konfirmon interesin e madh të publikut për projektin më të ri të këngëtares, i cili shënon një kapitull të ri në karrierën e saj. “Dirty Blonde” është albumi i katërt i Bebe Rexhës dhe i pari që vjen pas ndarjes së saj nga shtëpia diskografike me të cilën bashkëpunoi për vite me radhë, duke e prezantuar artisten në një fazë më të pavarur se kurrë.

Jo vetëm në tregun global, por edhe në Shtetet e Bashkuara albumi po performon mjaft mirë, duke siguruar një vend mes projekteve më të dëgjuara të momentit.

Me 13 këngë në repertor, “Dirty Blonde” ka sjellë disa nga bashkëpunimet më interesante të sezonit. Vëmendje të veçantë ka marrë “New Religion”, kënga e realizuar me grupin legjendar elektronik Faithless, ndërsa edhe “Sad Girls”, në bashkëpunim me David Guetta, po fiton terren të konsiderueshëm në platformat muzikore.

Me këtë debutim mbresëlënës, Bebe Rexha tregon se mbetet një prej artisteve më të suksesshme dhe më të kërkuara në industrinë globale të muzikës, duke vazhduar të shkëlqejë në skenën ndërkombëtare.