Madonna zbulon sakrificat para famës: “Zgjidhja takimet sipas dushit dhe vaskës”

Sot është një nga ikonat më të mëdha të muzikës në botë, por rruga e Madonna-s drejt suksesit nuk ka qenë aspak e lehtë. Këngëtarja legjendare ka ndarë së fundmi disa kujtime nga vitet e para të jetës së saj në New York, kur ende luftonte për të realizuar ëndrrën e madhe artistike.

Artistja 67-vjeçare ka treguar se gjatë viteve ’80 përballej me vështirësi ekonomike dhe shpesh jetonte në kushte shumë modeste. Madje, sipas saj, një detaj i pazakontë ndikonte edhe në mënyrën se si zgjidhte personat me të cilët dilte në takime.

“Dilja me burra duke u bazuar në faktin nëse kishin vaskë apo dush”, ka rrëfyer Madonna, duke shtuar se shpesh pyeste se ku jetonin dhe çfarë kushtesh kishin në banesat e tyre.

Këngëtarja ka pranuar se në atë periudhë lëvizte shpesh nga një vend në tjetrin dhe kërkonte mënyra për t’ia dalë mbanë në qytetin që do ta shndërronte më vonë në një superyll global.

Megjithëse sot gëzon famë dhe pasuri të jashtëzakonshme, Madonna thotë se pikërisht ato vite të vështira kanë qenë themeli i karakterit të saj. Sipas artistes, sfidat e asaj kohe e bënë më të fortë, më këmbëngulëse dhe e ndihmuan të ndërtojë personalitetin që më vonë do të pushtonte skenat botërore.

Rrëfimi i saj ka ngjallur reagime të shumta mes fansave, duke treguar se pas historisë së suksesit të një prej emrave më të mëdhenj të muzikës fshihen vite sakrificash, përpjekjesh dhe vendosmërie.