Haaland shpërthen në lot pas eliminimit të Brazilit: “Kjo është dita më e madhe në historinë e Norvegjisë”

Norvegjia ka shkruar një nga faqet më të lavdishme të historisë së saj në futboll, pasi eliminoi Brazilin me rezultatin 2-1 në 1/8 e finales së Kupës së Botës. Heroi absolut i mbrëmjes ishte Erling Haaland, i cili realizoi të dy golat që i siguruan kombëtares së tij një vend mes tetë ekipeve më të mira të turneut.

Pas vërshëllimës së fundit, emocionet pushtuan kampin norvegjez. Haaland dhe disa prej bashkëlojtarëve të tij nuk i mbajtën dot lotët, duke festuar një sukses që konsiderohet historik për futbollin e vendit të tyre.

“Kjo është, mendoj, dita dhe nata më e çmendur në historinë e Norvegjisë”, u shpreh sulmuesi i Manchester City-t, ende i emocionuar nga triumfi.

Haaland tha se shpreson që ky sukses të frymëzojë brezat e rinj dhe ta bëjë edhe më të madhe krenarinë për të veshur fanellën e kombëtares.

“Të luash për Norvegjinë është diçka e jashtëzakonshme. Kur isha më i ri ndoshta nuk e kuptoja plotësisht rëndësinë e saj, por sot e ndiej se sa e madhe është të përfaqësosh vendin tënd”, deklaroi ai.

Sulmuesi foli edhe për instinktin e tij para portës, duke pranuar se besimi në vetvete është çelësi i suksesit.

“Nëse më jepen një ose dy raste, zakonisht arrij të shënoj. Nuk e di saktësisht si ndodh, por gjithçka lidhet me përqendrimin dhe besimin se momenti do të vijë”, tha Haaland.

Me dopietën ndaj Brazilit, 25-vjeçari ka çuar në 62 numrin e golave në vetëm 54 paraqitje me Norvegjinë, një statistikë që konfirmon edhe një herë pse konsiderohet një nga sulmuesit më të frikshëm në futbollin botëror.

Tashmë Norvegjia vazhdon ëndrrën e saj në Kupën e Botës me moral të lartë dhe besimin se ky brez i artë mund të vazhdojë të shkruajë histori në skenën më të madhe të futbollit.