Belgjika kalon, festa e lukaku ndez polemika

Belgjika siguroi një fitore bindëse 4-1 ndaj SHBA-së, duke prerë biletën për në çerekfinalet e Kupës së Botës. Protagonisti absolut i sfidës ishte Charles De Ketelaere, i cili realizoi dy gola dhe dhuroi një asist, ndërsa Romelu Lukaku vulosi triumfin në minutat shtesë.

De Ketelaere zhbllokoi rezultatin që në minutën e 9-të dhe realizoi sërish në të 33-ën. Mes dy golave të belgut, SHBA ngushtoi diferencën me Malik Tillman, i cili shënoi nga goditja e dënimit. Në pjesën e dytë, Hans Vanaken realizoi golin e tretë pas asistit të De Ketelaere, ndërsa Lukaku, i aktivizuar nga stoli, vendosi shifrat përfundimtare 4-1 në minutën e 93-të.

Me këtë sukses, Belgjika do të përballet me Spanjën në çerekfinale, në një sfidë që pritet të jetë ndër më spektakolaret e turneut.

Megjithatë, ndeshja u shoqërua edhe me polemika jashtë fushës. Vëmendjen e mediave e mori vendimi për aktivizimin e sulmuesit amerikan Folarin Balogun, i cili luajti pavarësisht kartonit të kuq të marrë në ndeshjen e mëparshme. Raportimet ndërkombëtare kanë ngritur pretendime se pezullimi i tij u anulua pas ndërhyrjeve dhe presioneve politike, duke nxitur debat të madh në opinionin sportiv.

Pas vërshëllimës finale, festa e belgëve u bë po aq e komentuar sa edhe rezultati. Romelu Lukaku dhe bashkëlojtarët e tij festuan me një koreografi që shumë e interpretuan si një ironi ndaj Donald Trump.

Edhe Federata Belge e Futbollit iu bashkua atmosferës në rrjetet sociale, duke publikuar një foto të festimit me mbishkrimin “Shfuqizoje këtë”, një postim që, sipas raportimeve të mediave britanike, u konsiderua si një thumbim i drejtpërdrejtë ndaj ish-presidentit amerikan.