Startup-i i vajzës së Bill Gates në qendër të polemikave

Kompania teknologjike Phia, e bashkëthemeluar nga Phoebe Gates, vajza 23-vjeçare e bashkëthemeluesit të Microsoft, Bill Gates, është vënë në qendër të vëmendjes pas pretendimeve për praktika të diskutueshme gjatë blerjeve online.

Sipas një raporti të publikuar nga Bloomberg, zgjerimi i aplikacionit për shfletuesit e internetit dyshohet se ndërhynte në procesin e pagesave duke hapur në sfond dritare të padukshme dhe duke shtuar kode që ridrejtonin komisionet e marketingut në llogarinë e kompanisë Phia.

Ekspertët e marketingut digjital e konsiderojnë këtë metodë si “cookie stuffing”, një praktikë që bie ndesh me politikat e shumicës së platformave të tregtisë elektronike dhe mund të çojë në përfitime të padrejta nga programet e komisioneve.

Pas publikimit të raportit, kompania reagoi përmes një zëdhënësi, duke sqaruar se bëhej fjalë për një gabim teknik në kodin e aplikacionit, i cili sipas saj është korrigjuar menjëherë.

Pavarësisht polemikave, Phia vazhdon të rritet me ritme të shpejta. Platforma, e cila ndihmon përdoruesit të krahasojnë çmimet e veshjeve dhe të gjejnë ofertat më të leverdishme në internet me ndihmën e inteligjencës artificiale, ka siguruar së fundmi mbi 37 milionë euro investime nga fondet e Silicon Valley, duke arritur një vlerësim prej rreth 159 milionë eurosh.

Nga ana e saj, Phoebe Gates ka theksuar vazhdimisht se dëshiron ta ndërtojë karrierën mbi aftësitë e saj dhe jo mbi emrin e familjes. Ajo ka zbuluar se gjatë prezantimeve para investitorëve kishte zgjedhur të mos përmendte mbiemrin “Gates”, me synimin që projekti të vlerësohej vetëm për potencialin e tij.