Scaloni shpërthen në lot pas finales së Botërorit

Lionel Scaloni nuk arriti t’i përmbante emocionet pas humbjes së Argjentinës ndaj Spanjës në finalen e Kupës së Botës 2026.

Trajneri argjentinas u shfaq i përlotur gjatë konferencës për shtyp, ku foli për rrugëtimin e skuadrës dhe për vështirësinë e madhe për të krijuar sërish një grup me të njëjtën forcë dhe lidhje.

Scaloni pranoi se ndërtimi i një skuadre të tillë kërkon shumë punë dhe se ideja për të nisur gjithçka nga fillimi ishte veçanërisht e dhimbshme për të. Në një moment, emocionet u bënë të papërballueshme dhe ai u ngrit nga karrigia, duke u larguar nga konferenca me fjalët: “Më falni”.

Argjentina luftoi deri në fund, duke e çuar ndeshjen në vazhdime edhe pse luajti me një lojtar më pak. Scaloni la të kuptohej se historia e finales mund të kishte qenë ndryshe nëse skuadra e tij do të kishte qëndruar e plotë në fushë.

Në anën tjetër, trajneri i Spanjës, Luis de la Fuente, i dha mbështetje publike homologut të tij, duke vlerësuar punën e jashtëzakonshme të Scalonit dhe rekordet e vendosura gjatë karrierës së tij me Argjentinën.

Kontrata e Scalonit me Federatën Argjentinase të Futbollit skadon në dhjetor, ndërsa trajneri ka konfirmuar se do ta respektojë marrëveshjen deri në fund.