FBI ndalon kreun e futbollit argjentinas? AFA mohon gjithçka

Presidenti i Federatës Argjentinase të Futbollit, Claudio “Chiqui” Tapia, është bërë pjesë e një raportimi që ka shkaktuar bujë në botën e futbollit, pasi mediat argjentinase pretendojnë se ai është ndaluar nga agjentë të FBI-së në aeroportin JFK të Nju Jorkut.

Sipas këtyre raportimeve, ndalimi lidhet me një hetim amerikan për kontrata komerciale dhe transaksione financiare të lidhura me AFA-n, ku autoritetet po shqyrtojnë lëvizje financiare me vlerë mbi 300 milionë dollarë.

Pretendimet sugjerojnë se hetimi përfshin dyshime për parregullsi financiare, përfshirë pastrim parash dhe mashtrim përmes sistemit bankar amerikan. Gjithashtu është raportuar se autoritetet kanë analizuar kontrata të menaxhuara nga kompani që lidhen me pagesa për shërbime si transport, fluturime private dhe marrëveshje tregtare të federatës.

Megjithatë, Federata Argjentinase e Futbollit ka reaguar menjëherë duke i hedhur poshtë këto pretendime. Në një deklaratë zyrtare, AFA ka mohuar se Tapia është marrë në pyetje, se i janë sekuestruar pajisje elektronike apo se është përballur me ndonjë procedurë ligjore në aeroport.

Federata theksoi se presidenti i saj dhe sekretari Pablo Toviggino nuk janë thirrur për dëshmi dhe nuk kanë asnjë detyrim procedural ndaj autoriteteve amerikane, duke e cilësuar lajmin si “kategorikisht të pavërtetë”.

Sipas AFA-s, vetëm një palë e tretë është thirrur për të dhënë dëshmi para një jurie federale në Shtetet e Bashkuara.

Hetimi amerikan vijon dhe deri tani nuk është konfirmuar nëse ndonjë prej transaksioneve të shqyrtuara përbën shkelje ligjore. Ndërkohë, rasti ka tërhequr vëmendjen ndërkombëtare, sidomos pas suksesit të fundit të Argjentinës në arenën botërore të futbollit.