Larne reagon pas banerit politik skandaloz në Champions league

Klubi irlandez Larne FC ka reaguar pas një incidenti të ndodhur gjatë sfidës së Champions League ndaj Crvena Zvezdës, ku në tribunat e stadiumit u shfaq një baner me përmbajtje politike.

Përmes një deklarate zyrtare, klubi bëri të ditur se ishte në dijeni të pamjeve që qarkulluan në rrjetet sociale dhe se stafi i sigurisë ndërhyri menjëherë për ta larguar banerin nga stadiumi.

Sipas Larne, flamuri u shfaq gjatë pjesës së parë të ndeshjes në tribunën McKay, por u hoq menjëherë sapo u vu re nga organizatorët.

Klubi irlandez theksoi se përballja ndaj Crvena Zvezdës ishte një moment historik për ekipin, qytetin dhe komunitetin, pasi ishte një mundësi për të pritur një klub me traditë dhe histori të madhe në futbollin evropian.

Larne sqaroi gjithashtu se personi që shfaqi banerin nuk ishte tifoz i klubit dhe ndodhej në tribunë si spektator neutral, duke shtuar se veprimi i një individi nuk duhet të ndikojë në rëndësinë e kësaj nate të veçantë për klubin.

Incidenti vjen në një periudhë kur UEFA dhe klubet evropiane kanë shtuar masat ndaj shfaqjeve politike në stadiume, me synimin për të ruajtur fokusin te sporti dhe konkurrenca.