Flakët detyrojnë George dhe Amal Clooney të largohen nga shtëpia

George dhe Amal Clooney janë detyruar të evakuojnë rezidencën e tyre në Brignoles, në juglindje të Francës, pasi zjarret masive pyjore kanë përfshirë zonën dhe vazhdojnë të përhapen me shpejtësi.

Në një letër drejtuar kryebashkiakut Didier Bremond, çifti shprehet se nuk e di nëse shtëpia e tyre do t’i shpëtojë flakëve, duke e cilësuar situatën si një nga momentet më të vështira që kanë përjetuar.

Megjithatë, George dhe Amal theksuan se shqetësimi i tyre më i madh mbetet siguria e banorëve të zonës. Ata u zotuan se, pavarësisht dëmeve që mund të shkaktohen, do të vazhdojnë të mbështesin komunitetin dhe të kontribuojnë në rindërtimin e tij.

Çifti jeton në fermën e tyre në Francë së bashku me binjakët Ella dhe Alexander, duke preferuar një jetë të qetë larg zhurmës së Hollivudit. Në intervista të mëparshme, George Clooney ka treguar se zgjedhja për t’u vendosur në Francë ishte bërë për t’u ofruar fëmijëve një fëmijëri më pranë natyrës dhe larg vëmendjes së vazhdueshme mediatike.

Sipas raportimeve, zjarri është ende jashtë kontrollit dhe ka përfshirë një sipërfaqe gjigante, duke kërcënuar qindra banesa në rajon. Ndërsa autoritetet vijojnë betejën me flakët, mbetet e paqartë nëse rezidenca e familjes Clooney ka arritur t’i shpëtojë katastrofës.