Katy Perry “humbet” mbi publik, momenti bëhet viral

Katy Perry u bë protagoniste e një momenti sa të papritur, aq edhe komik gjatë koncertit të saj në festivalin Isle of MTV Malta, kur një efekt skenik nuk shkoi sipas planit.

Teksa interpretonte hitin “I Kissed a Girl”, ylli i pop-it u fut në një shishe gjigante transparente, e projektuar për të “lundruar” mbi turmën dhe për t’u rikthyer në skenë. Por publiku e shtyu në drejtimin e gabuar, duke e larguar gjithnjë e më shumë nga skena.

Pamjet që pushtuan rrjetet sociale tregojnë Katy Perry-n duke u përpjekur t’u sinjalizojë fansave se ku duhej ta drejtonin shishen. Në një moment, këngëtarja u dëgjua duke u kërkuar ta kthenin drejt një rekuiziti në formë kashte, që shërbente si pika e rikthimit në skenë.

Pas disa minutash konfuzioni dhe shumë të qeshurash, publiku arriti ta rikthente shishen në drejtimin e duhur dhe koncerti vazhdoi normalisht. Sapo u ngjit sërish në skenë, Katy falënderoi fansat me humor, duke thënë se ia dolën ta “kthejnë shishen në destinacion”.

Momenti u bë menjëherë viral në internet, ku përdoruesit shpërndanë meme dhe komente plot humor. Mes tyre nuk munguan as batutat se “shishes i humbi GPS-i”, duke e kthyer incidentin në një nga episodet më argëtuese të këtij sezoni koncertesh.