Shania Twain flet hapur për plakjen: “Trupi im nuk është diçka për t’u turpëruar”

Ikona e muzikës country-pop Shania Twain ka ndarë një rrëfim të sinqertë për ndryshimet që ka kaluar gjatë viteve, duke folur për menopauzën, shëndetin dhe presionin që shumë gra përjetojnë për të ruajtur një pamje të caktuar.

Në një intervistë për People, këngëtarja tha se menopauza ndikoi edhe në një incident të vitit 2019 gjatë një shfaqjeje në Las Vegas, ku u detyrua të largohej nga skena pasi pësoi një dëmtim fizik. Sipas saj, më pas u përball me probleme muskulore dhe lodhje të shkaktuar nga dehidratimi dhe mungesa e përgatitjes së duhur për kushtet klimatike.

Twain pranoi se ka kaluar edhe një periudhë të vështirë me mënyrën se si e shihte veten. Ajo tregoi se dikur ndihej shumë e sigurt me pamjen e saj, por ndryshimet fizike me kalimin e viteve e bënë të përballej me një realitet të ri.

Sot, artistja 56-vjeçare thotë se ka një tjetër këndvështrim dhe se prioriteti i saj nuk është më të rikthehet te pamja e rinisë, por të ndihet mirë me veten.

“Mirëqenia vjen gjithmonë e para. Nuk po përpiqem të jem 30 apo 25 vjeç. Duhet ta shijojmë veten ashtu siç jemi tani”, u shpreh Twain.

Këngëtarja theksoi se plakja është një proces përshtatjeje dhe solli si shembull sportin. Ajo tregoi se edhe aktivitetet që dikur i bënte pa problem, si tenisi, tashmë i përshtat me mundësitë e trupit të saj.

Përballë kritikave për pamjen, Shania Twain thotë se ka arritur një pikë ku komentet negative nuk e ndikojnë më.

“Trupi im nuk është diçka për të cilën duhet të turpërohem. Me kohën dhe pjekurinë vjen edhe guximi”, deklaroi këngëtarja.

Me një karrierë prej dekadash dhe miliona fansa në mbarë botën, Shania Twain vazhdon të përcjellë një mesazh pozitiv për pranimin e vetes dhe fuqinë që vjen me përvojën e jetës.