Eurovision 2027 ndryshon rregullat, EBU prezanton reformën e re

Eurovision 2027 do të vijë me një sërë rregullash të reja që pritet të ndryshojnë mënyrën e organizimit dhe zhvillimit të spektaklit më të madh muzikor në Evropë. Bashkimi Evropian i Transmetuesve (EBU) ka prezantuar një paketë ndryshimesh që synojnë ta bëjnë garën më të drejtë, më transparente dhe më të sigurt.

Një nga risitë më të rëndësishme lidhet me organizimin e festivalit. Sipas rregullores së re, vendi fitues nuk do ta ketë më të garantuar automatikisht të drejtën për të organizuar edicionin pasardhës. Nëse situata e sigurisë, konfliktet apo rrethana të tjera e bëjnë të pamundur mikpritjen, EBU do të ketë të drejtën të zgjedhë një transmetues tjetër për zhvillimin e konkursit.

Ndryshime janë bërë edhe për performancat në skenë. Këngëtari kryesor do të jetë i detyruar të interpretojë vokalin live gjatë gjithë këngës. Elementët muzikorë të regjistruar paraprakisht do të lejohen, por nuk do të mund të përdoren për të zëvendësuar ose përforcuar në mënyrë të konsiderueshme zërin kryesor.

Një tjetër risi prek moshën e artistëve. Duke nisur nga edicioni i vitit 2027, pjesëmarrësit duhet të kenë mbushur të paktën 18 vjeç në ditën e provës së parë, duke zëvendësuar kufirin aktual prej 16 vitesh.

EBU ka parashikuar ndryshime edhe në sistemin e votimit. Në gjysmëfinale, kualifikimi do të mbështetet kryesisht te vota e publikut, ndërsa përfshirja e jurive profesionale do të mbetet e mundur vetëm nëse miratohet nga organizatorët. Gjithashtu, do të vendosen kufizime për fushatat agresive që synojnë të ndikojnë te votimi, veçanërisht ato të mbështetura nga shtete ose institucione.

Me këto rregulla të reja, EBU synon të forcojë besueshmërinë e festivalit dhe të garantojë një konkurrim më të barabartë për të gjithë artistët. Eurovision 2027 është planifikuar të zhvillohet në Bullgari.