Barazime për Egnatian, Dinamon dhe Dritën në Europë – gjithçka vendoset në ndeshjet e kthimit

Tri skuadrat shqiptare që luajtën mbrëmë në fazën “play-off” të kompeticioneve europiane e mbyllën ndeshjen e parë me barazime, duke lënë gjithçka të hapur për sfidat e kthimit javën e ardhshme.

Egnatia 0-0 Lillestrøm

Kampionët e Shqipërisë morën një rezultat pa gola ndaj Lillestrøm në “Arena Egnatia”, në ndeshjen e parë të “play-off”-it të Europa League. Egnatia zhvilloi një përballje të kujdesshme ndaj skuadrës norvegjeze dhe tashmë do ta kërkojë kualifikimin në ndeshjen e kthimit, më 27 gusht në Norvegji.

Pas përmbysjes spektakolare 5-1 ndaj Shamrock Rovers në raundin e kaluar, Egnatia vazhdon kështu aventurën europiane dhe mbetet vetëm një hap larg fazës së ligës së Europa League.

Dinamo City 1-1 Pafos

Në “Elbasan Arena”, Dinamo City mori një barazim 1-1 ndaj Pafos të Qipros në “play-off”-in e Conference League.

Blutë kaluan në avantazh në minutën e 78-të me David Fadairo, duke ndezur shpresat për një fitore të madhe. Megjithatë, vetëm pesë minuta më vonë Pafos barazoi nga pika e bardhë me Lelé, duke vendosur rezultatin përfundimtar.

Dinamo do të udhëtojë në Qipro më 27 gusht për ndeshjen e kthimit, ku do të kërkojë një rezultat pozitiv për të siguruar kualifikimin në fazën e ligës së Conference League.

Drita 2-2 Inter Escaldes

Edhe Drita e Kosovës nuk arriti të fitojë në shtëpi, duke barazuar 2-2 me Inter Escaldes në “Fadil Vokrri”, në një ndeshje me shumë emocione.

Gjilanasit tani do të udhëtojnë drejt Andorrës me objektivin për të marrë fitoren që do t’i dërgonte në fazën e ligës së Conference League. Përballja mbetet plotësisht e hapur pas 90 minutave të para.

Kështu, Egnatia, Dinamo City dhe Drita e mbyllën të trija ndeshjen e parë pa humbje, por asnjëra nuk ka arritur të krijojë avantazh përpara sfidave të kthimit. Java e ardhshme do të jetë vendimtare për fatin europian të të treja skuadrave.