Arta Bajrami bën deklaratën e papritur: “Këngën nuk ma pranuan për shkak të Elhaida Danit”

Këngëtarja shqiptare Arta Bajrami ka bërë një deklaratë të papritur gjatë një interviste në emisionin “Artistët Shqiptarë”, ku ka rrëfyer një episod që, sipas saj, lidhet me Festivalin e Këngës në RTSH.

Bajrami pretendon se një këngë e saj nuk ishte pranuar në festival dhe e ka lidhur këtë me një hatërmbetje që, sipas saj, kishte nisur në vitin 2015, kur Elhaida Dani përfaqësonte Shqipërinë në Eurovision.

“Nuk më kanë pranuar këngën dhe askush nuk e di këtë gjë, sot po e tregoj te ti. E kam ditur që kur është Elhaida nuk ia pranon Arta Bajramit këngën, ka mbet një hatërmbetje prej atëherë, sepse këngën e kam pasur shumë të mirë”, është shprehur këngëtarja.

Arta nuk dha më shumë detaje se si do të ishte ndikuar konkretisht përzgjedhja e këngës së saj dhe nuk paraqiti prova publike për pretendimin. Ndërkohë, deri tani, Elhaida Dani nuk ka reaguar publikisht lidhur me deklaratën.

Pavarësisht kësaj, Bajrami ka bërë të qartë se nuk ka hequr dorë nga dëshira për të marrë pjesë në Festivalin e Këngës. Ajo tha se planifikon të aplikojë sërish vitin e ardhshëm me një këngë të sajën.

“Me një këngë timen vitin e ardhshëm e kam plan me shku. Nëse është Elhaida sërish, ndoshta këtu nuk e shikon”, shtoi ajo.

Deklarata ka tërhequr vëmendjen në rrjetet sociale dhe në mediat rozë, ndërsa tashmë mbetet për t’u parë nëse Elhaida Dani do të reagojë apo do ta lërë pa koment këtë pretendim të Artës.