Jonida rrëfen jetën private dhe lidhjen me Alessio Alian: “Më kthen fëmijën që kam brenda”
Written by radio wave on September 23, 2026
E ftuar në emisionin “Live From Tirana”, këngëtarja Jonida ka folur hapur për një nga ndryshimet më të mëdha që ka përjetuar me kalimin e viteve, duke treguar se sot e sheh veten dhe jetën me një tjetër perspektivë.
Ajo u shpreh se mosha dhe përvojat personale e kanë mësuar të kujdeset më shumë për veten dhe të mos i kushtojë aq rëndësi mendimit të të tjerëve. Sipas Jonidës, pasi jeta të përball me vështirësi dhe të rrëzon disa herë, fillon të kuptosh më qartë se cilat janë gjërat dhe njerëzit që kanë vërtet rëndësi.
Kjo qasje, sipas saj, është reflektuar edhe në jetën private dhe në marrëdhënien e saj me ish-banorin e “Big Brother VIP 5”, Alessio Alian.
Jonida nuk e fsheh dashurinë për partnerin, por preferon që lidhjen ta mbajë larg ekspozimit të tepruar publik. Ajo ka shpjeguar se kjo zgjedhje lidhet edhe me dëshirën për të mbrojtur fëmijët dhe familjet e tyre nga titujt sensacionalë dhe vëmendja e panevojshme mediatike.
Të dy janë prindër të divorcuar dhe kanë histori personale pas vetes, ndaj Jonida thekson se sot për të është e rëndësishme që marrëdhënia të ketë një status të qartë dhe të jetë e bazuar te mirëkuptimi.
Por lidhja nuk është gjithmonë e lehtë. Distanca sjell edhe sfidat e saj, me periudha mungese, pasigurie apo largësie, edhe pse ribashkimet i japin marrëdhënies momente të veçanta.
Megjithatë, përtej vështirësive, Jonida foli me shumë pozitivitet për atë që Alessio i sjell në jetën e saj.
“Alessio hera-herës më kthen fëmijën që kam brenda dhe është gjëja më e bukur në botë”, u shpreh këngëtarja gjatë intervistës.
Një deklaratë që tregon se, pavarësisht eksperiencave dhe viteve që kanë kaluar, Jonida duket se po e shijon një fazë ku dashuria, qetësia dhe njerëzit e rëndësishëm në jetën e saj kanë marrë një tjetër peshë.
