Stresi tërhiqet përkohësisht nga muzika: “Kam kaluar shumë gjëra, po marr pak kohë”

Stresi ka njoftuar në Instagram se do të shkëputet përkohësisht nga muzika dhe rrjetet sociale. Përmes një deklarate të publikuar më 28 shtator, reperi u ka bërë të ditur fansave se ka vendosur të marrë pak kohë për veten dhe për të nisur një kapitull të ri.

Në mesazhin e tij, Stresi kujton uljet dhe ngritjet që ka kaluar gjatë karrierës, duke falënderuar fansat, kolegët dhe edhe kritikët që kanë qenë pjesë e rrugëtimit të tij. Ai thekson se kjo shkëputje nuk duhet parë si një lamtumirë, por si një pauzë për të ndërtuar diçka tjetër.

“Kam kaluar shumë gjëra, kam rënë, jam ngritur, kam humbur njerëz dhe kam fituar njerëz”, është një nga mesazhet që reperi ka përcjellë në deklaratën e tij.

Stresi nuk ka bërë të ditur se sa do të zgjasë kjo pauzë dhe as se çfarë projekti ka në plan gjatë kësaj periudhe. Ajo që ka bërë të qartë është se muzika nuk është një kapitull i mbyllur për të dhe se rikthimi i tij do të vijë në një moment tjetër.

Deklarata ka shkaktuar reagime të shumta nga fansat, të cilët tashmë presin të zbulojnë se çfarë fshihet pas këtij vendimi të papritur.