Komediani turk dënohet me mbi 19 muaj burg pas batutave për Erdoğan

Komediani turk Deniz Göktaş është dënuar nga një gjykatë në Stamboll me 19 muaj e 10 ditë burg, pas një performance stand-up në të cilën bëri batuta për presidentin Recep Tayyip Erdoğan dhe fenë. Göktaş u shpall fajtor për “fyerje të presidentit” dhe “fyerje të vlerave fetare”, ndërsa u shpall i pafajshëm për akuzën e lavdërimit të krimit.

Çështja nisi pasi pjesë të spektaklit të tij “Dead Sea”, të publikuar në YouTube, u bënë virale dhe morën miliona shikime. Në një prej batutave që u përfshinë në çështjen gjyqësore, Göktaş e përshkroi Erdoğan-in si një “diktator të turpshëm”, ndërsa në gjykatë argumentoi se kjo ishte një karakterizim politik dhe pjesë e satirës së tij.

Göktaş kishte qëndruar rreth 88 ditë në paraburgim që prej arrestimit në korrik. Gjatë seancës, ai mbrojti të drejtën e humorit dhe satirës, ndërsa mbrojtja e tij shkaktoi edhe të qeshura në sallën e gjyqit.

Pavarësisht dënimit, gjykata urdhëroi lirimin e tij në pritje të procesit të apelimit, ndaj vendimi nuk është ende përfundimtar. Rasti ka rikthyer në qendër të vëmendjes debatin në Turqi mbi kufijtë e satirës dhe lirisë së shprehjes, veçanërisht kur bëhet fjalë për kritikat ndaj presidentit.