zbulim i ri arkeologjik në Norvegji tregon vendbanimet e lashta

Arkeologët në Norvegji kanë zbuluar gjurmë të reja të strukturave funerale që kishin qëndruar të fshehura nën tokë për mijëra vite.

Zbulimi është bërë në Hunnfeltet, në Østfold, një nga zonat më të rëndësishme arkeologjike të Norvegjisë, ku prej kohësh njihen varre dhe rrathë të mëdhenj prej guri.

Por këtë herë, arkeologët kanë zbuluar struktura të reja që nuk dukeshin në sipërfaqe. Përmes radarëve të tokës dhe gërmimeve, ata kanë identifikuar disa rrathë guri të formuar nga gjurmë rrethore në tokë, të lidhura me struktura funerale të lashta.

Disa prej këtyre strukturave kanë përmasa prej disa metrash dhe besohet se janë ndërtuar më shumë se 2 mijë vite më parë. Zona përreth ka nxjerrë më herët në dritë varre me objekte të ruajtura mirë nga periudha romake.

Ajo që e bën zbulimin veçanërisht interesant është fakti se gjithçka ishte fshehur nën një fushë bujqësore. Arkeologët e ekzaminuan zonën përpara punimeve të planifikuara për drenazh dhe radarët treguan se toka fshihte shumë më tepër histori nga sa dukej në sipërfaqe.

Dhe duket se Norvegjia ende nuk i ka treguar të gjitha sekretet e saj. Gërmimet vazhdojnë, ndërsa studiuesit po përpiqen të kuptojnë se si janë përdorur këto struktura dhe çfarë mund të zbulohet më tej nën tokë.