Kasetat sekrete të Oasis vlejnë miliona – por Gallagher-ët nuk i duan në duart e publikut

Ka disa gjëra që Oasis nuk dëshiron t’i dëgjojë publiku. Dhe këtë herë nuk po flasim për një këngë të re, por për më shumë se 100 orë material të papublikuar që mund të vlejnë deri në 1.6 milionë paund.

Grupi ka ndërmarrë veprime ligjore për të bllokuar shitjen në ankand të një arkivi të rrallë regjistrimesh, i njohur si “The Desk Tapes”. Materialet janë regjistruar gjatë viteve të para të karrierës së Oasis dhe përfshijnë jo vetëm koncerte, por edhe prova, soundcheck-e dhe biseda të papublikuara mes Liam dhe Noel Gallagher.

Në arkiv ndodhen 209 kaseta DAT, 73 kaseta analoge dhe tre MiniDisc-e. Mes tyre është edhe një regjistrim i rrallë i një koncerti të Oasis në Loch Lomond, në Skoci, në vitin 1996.

Ankandi ishte planifikuar për 3 tetor, por pas veprimit ligjor të Oasis, regjistrimet janë tërhequr nga shitja. Pra, fansat që shpresonin të dëgjonin ndonjë copëz të panjohur nga epoka e artë e grupit duhet të presin.

Dhe këtu vjen pjesa më interesante: edhe sikur dikush të arrinte t’i blinte kasetat, kjo nuk do të thotë automatikisht se mund t’i publikonte. Të drejtat mbi materialet muzikore dhe përdorimin e tyre mbeten një çështje më vete.

Me pak fjalë, dikush ka në duar një pjesë të historisë së Oasis që mund të vlejë miliona… por për momentin, Liam dhe Noel duket se preferojnë që këto kaseta të vazhdojnë të qëndrojnë në sirtar.