ENEDA TARIFA RRËFEN PËR DEPRENSIONIN DHE PËRVOJAT ME ANKTHIN: “NUK ISHA GATI TË PRANOJA TË SHKOJA TE PSIKOLOGU”

Këngëtarja e njohur Eneda Tarifa ka hapur zemrën gjatë një interviste të fundit, ku ka ndarë me publikun disa nga sfidat e saj më personale. Ajo ka zbuluar se ka pasur momente kur është ndier e dobët dhe madje ka kaluar periudha që mund të jenë konsideruar si depresion, por që nuk e ka kuptuar menjëherë.

Në intervistën e saj për emisionin “Natën me Aulonën”, Eneda tregoi se, megjithëse ka ndjerë tension dhe shqetësim, nuk ka kërkuar kurrë ndihmë nga një profesionist. Ajo shpjegoi se ka tentuar disa herë të shkonte te psikologu, por gjithmonë ka ndërruar mendje në moment të fundit. “Te psikologu nuk kam qenë asnjëherë. Kam tentuar disa herë. Kam lënë edhe orare dhe pastaj më është ndërruar mendja gjithmonë në moment të fundit”, tha Eneda.

Ajo pranoi se ka pasur një periudhë kur mund të ketë kaluar në depresion, por nuk e ka kuptuar atëherë. “Madje, ka pasur edhe një moment kur unë mund të kem kaluar në depresion dhe nuk e dija që po kaloja një depresion. Mirëpo, më vonë e kam kuptuar që të gjitha ato shenja dhe simptoma që unë kisha, kishin të bënin me depresionin. Sigurisht, depresion i lehtë. Edhe momente ankthi kam pasur”, shpjegoi këngëtarja.

Eneda gjithashtu theksoi se ka përjetuar momente ankthi dhe pasigurie për jetën. Ajo përshkroi ndjesitë e frikës dhe paqartësisë, duke thënë: “Edhe momente kur ti thua ‘pse jam, pse ekzistoj’… frikë për jetën, ankth se dikush është aty dhe të duket si e pamundur jetesa të nesërmen”. Megjithatë, ajo beson se këto ndjenja janë të natyrshme për çdo njeri në momente të caktuara të jetës.

Për Enedën, periudha më e vështirë u kalua përmes një terapie alternative: muzika. “Këtë periudhë e kam kaluar me terapi muzikore”, ka shpjeguar ajo. Kjo metodë ka ndihmuar këngëtaren të përballojë sfidat dhe të gjejë një mënyrë për të shprehur ndjenjat dhe emocionet e saj.

Ajo gjithashtu ka folur hapur për arsyen pse nuk ka kërkuar ndihmë profesionale. “Sepse nuk kam qenë gati të pranoj që dikush tjetër duhet të dëgjojë çfarë kam brenda meje, disa gjëra që ti do t’i kalosh dhe t’i ruash me veten tënde. Ky ka qenë hezitimi”, tha Eneda, duke shtuar se, në Shqipëri, psikologu ende shikohet si një tabu. “Psikologu nuk është si të shkosh te dentisti, akoma. Është akoma një tabu që edhe pse unë e predikoj dhe them se duhet shkuar, vetë nuk e kam bërë ndonjëherë. Por kush ka nevojë ta bëjë, duhet ta bëjë.”

Përmes këtij rrëfimi, Eneda ka nxjerrë në pah jo vetëm sfidat që ka kaluar, por edhe nevojën për të pranuar ndihmën kur është e nevojshme dhe për të thyer tabu për sa i përket kujdesit mendor. Ajo inkurajon gjithashtu ata që kanë nevojë për mbështetje të kërkojnë ndihmën që u nevojitet, pasi është një hap i rëndësishëm në përmirësimin e mirëqenies emocionale dhe psikologjike.