“THE VOICE OF HIND RAJAB” MAHNIT VENECIAN ME OVACION REKORD DHE MESAZH TË FUQISHËM PËR PALESTINËN

Filmi “The Voice Of Hind Rajab” nga regjisorja tuniziane Kaouther Ben Hania shkaktoi një emocion të jashtëzakonshëm në Festivalin e Filmit në Venecia, duke marrë një ovacion në këmbë që zgjati plot 23 minuta e 50 sekonda, ndër më të gjatat në historinë e festivaleve ndërkombëtare të kinemasë. Salla shpërtheu me duartrokitje dhe brohoritje “Palestina e lirë (Free Palestine)”, duke e kthyer premierën në një moment të pazakontë artistik dhe politik. Filmi dramatizon historinë e gjashtëvjeçares Hind Rajab, e cila u vra së bashku me familjen e saj dhe dy ndihmësmjekë, pasi makina e tyre u godit nga forcat izraelite në Gaza në janar 2024, vetëm tre muaj pas fillimit të operacionit ushtarak izraelit që la pas mbi 61,000 viktima palestineze.

Ky ovacion thyen rekordin e mëparshëm të Festivalit të Kanës, ku në vitin 2006 filmi “Pan’s Labyrinth” i Guillermo del Toro u duartrokit 22 minuta, si dhe atë të Venecias vitin e kaluar me filmin e Almodovar “The Room Next Door” që arriti 18 minuta. Gjatë duartrokitjeve në premierë, aktori Motaz Malhees ngriti flamurin palestinez, duke shtuar emocionin e publikut, mes të cilëve shumë nuk i mbajtën dot lotët. Filmi u mbështet nga emra të mëdhenj të Hollywood-it si Brad Pitt, Joaquin Phoenix, Rooney Mara, Alfonso Cuaron dhe Jonathan Glazer, me Phoenix dhe Mara që morën pjesë në premierë dhe u fotografuan me ekipin duke mbajtur portretin e vogëlushes Hind.

Tunizia ka zgjedhur “The Voice Of Hind Rajab” si kandidatin e saj zyrtar për çmimin Oscar në kategorinë e filmit më të mirë ndërkombëtar. Në konferencën për shtyp, aktorja Saja Kilani mbajti një fjalim të fuqishëm: “Mjaft me vrasje masive, uri, dehumanizim, shkatërrim dhe pushtim. Ky film nuk është opinion, është e vërtetë. Historia e Hindit mbart peshën e një kombi të tërë. Është zëri i çdo fëmije palestinez që iu mohua jeta dhe ëndrrat”. Ndërkohë, në Lido u zhvillua një protestë masive në mbështetje të Palestinës, duke e kthyer këtë edicion të festivalit në një skenë solidariteti global.