IKONA E R&B-SË, D’ANGELO, NDËRRON JETË NË MOSHËN 51-VJEÇARE

Bota e muzikës është zhytur në zi pas lajmit të ndarjes nga jeta të muzikantit dhe producentit legjendar amerikan, D’Angelo, në moshën vetëm 51-vjeçare. Lajmi u konfirmua nga familja e artistit përmes një deklarate prekëse.

“Ylli që ka ndriçuar familjen tonë ka ndalur dritën e tij në këtë jetë… Pas një beteje të gjatë me kancerin, me zemër të thyer njoftojmë se Michael D’Angelo Archer, i njohur nga fansat e tij në mbarë botën si D’Angelo, ka ndërruar jetë sot, më 14 tetor 2025,” thuhet në deklaratë. “Jemi të pikëlluar, ai ka lënë pas vetëm kujtime të dashura për familjen, por jemi përjetësisht mirënjohës për trashëgiminë e muzikës së jashtëzakonshme që ka lënë. Ju lutemi të respektoni privatësinë tonë gjatë kësaj kohe të vështirë, por ju ftojmë të bashkoheni me ne në dhimbje.”

Sipas raportimeve të TMZ, shkaku i vdekjes së këngëtarit ishte kanceri i pankreasit, një sëmundje me të cilën ai kishte luftuar prej kohësh.

I lindur në Virginia, D’Angelo u bë një nga figurat më me ndikim të muzikës neo-soul dhe R&B. Ai publikoi tre albume studio që lanë gjurmë të pashlyeshme në historinë e muzikës moderne, duke përfshirë debutimin e tij “Brown Sugar” (1995) dhe kryeveprën “Voodoo”, që e ngriti në piedestalin e artistëve më të respektuar të zhanrit.

Albumi i tij i fundit, “Black Messiah”, solli një rikthim triumfal me 12 këngë që preknin tema të dashurisë, shpirtit dhe drejtësisë sociale. Kënga “Really Love” – e para pas një pauze të gjatë që nga “I Found My Smile Again” (2008) – u bë një sukses i menjëhershëm, ndërsa albumi arriti vendin e parë në tabelat R&B/Hip-Hop dhe Indie Store në ShBA, duke u renditur gjithashtu në top 5 të US Billboard 200.

Me vokalin e tij magjepsës, stilin unik dhe ndikimin e thellë në muzikën bashkëkohore, D’Angelo mbetet një ikonë e pavdekshme që ndryshoi përgjithmonë tingullin e soul-it modern.

Pusho në paqe, mbret i shpirtit.