HELIDON HALITI NË RADIO WAVE 108 FM: BIENALJA E AKUARELIT, NGA NJË ËNDËRR NË NJË NGJARJE BOTËRORE TË ARTIT

Sot në studion e Radio Wave 108 FM ishte i ftuar piktori dhe organizatori i njohur Helidon Haliti, themelues i Bienales së Akuarelit në Tiranë, një nga ngjarjet më të rëndësishme të artit bashkëkohor në Shqipëri dhe rajon.

Haliti ndau me dëgjuesit historinë e një rrugëtimi që nisi në vitin 2012 dhe që sot ka bashkuar mbi 3,500 artistë nga e gjithë bota, duke krijuar një komunitet unik të dashuruar pas artit të akuarelit. Ai tregoi se shumë prej veprave të ekspozuara ndër vite janë dhuruar Fondit Shqiptar të Akuarelit, një pasuri e vyer që tashmë i përket publikut shqiptar.

Edicioni i gjashtë i Bienales është hapur më 15 tetor në Galerinë e Artit të Tiranës dhe do të qëndrojë i hapur deri në fund të muajit. Në këtë edicion janë ekspozuar rreth 200 punime nga artistë vendas dhe të huaj, ndërsa interesi ndërkombëtar ka qenë rekord. Ngjarja është mbështetur nga Ministria e Kulturës, Bashkia e Tiranës dhe partnerët VizArt dhe Click Expo Group.

Haliti tha se artistët e huaj e kanë pritur me entuziazëm ftesën për të marrë pjesë, duke e parë Shqipërinë si një “pikë bosh në hartën e tyre kulturore” që tashmë është kthyer në një destinacion të respektuar në botën e artit. Në mesin e pjesëmarrësve janë edhe emra të njohur si Alvaro Castagna, Stanislav Zolas, Kapur dhe Pradfur, të cilët performojnë drejtpërdrejt gjatë ditëve të Bienales.

Fituesit e këtij edicioni janë shpallur:
Çmimi “Ismail Lulani” – Ikbale Kalaja Bushati dhe Abaz Hado
“Best Avant-Garde Artist” – Ardian Isufi
“Best Watercolor Master” – Nestor Jonuzi

Haliti falënderoi bashkëpunëtoren e tij të ngushtë Ormira Lulani, bijë e artistit të madh Ismail Lulani dhe drejtore e VizArt, për kontributin e saj të çmuar në zhvillimin e këtij projekti kulturor.

Gjatë intervistës, piktori ngriti edhe një shqetësim për fenomenin e plagjiaturës në art, duke theksuar se suksesi i Bienales ka sjellë edhe përpjekje për imitime.
“Arti kërkon origjinalitet dhe shpirt. Nuk mund të ketë frymë artistike aty ku mungon autenticiteti,” u shpreh Haliti.

Sipas tij, fondi total i pikturave të Bienales përllogaritet në rreth 4 milionë euro, me mbi 450 vepra të dhuruara që do të ruhen si pasuri kombëtare.

Në mbyllje, ai përcolli mesazhin që përmbledh filozofinë e Bienales:
“Kjo ngjarje synon të krijojë harmoni, bashkëpunim mes brezave dhe dialog kulturor. Arti është si një stafeta që duhet të kalojë nga një brez tek tjetri.”

Duke folur për Tiranën, Haliti e përshkroi si një qytet modern e multikulturor, ku bashkëjetojnë mbi 150 kombësi të ndryshme. “Nëse do ta pikturoja Tiranën, ngjyrat e saj do të duhej të ishin të harmonizuara – si vetë njerëzit që jetojnë këtu,” tha ai me buzëqeshje.

Bienalja e Akuarelit do të vazhdojë të jetë e hapur për publikun deri në fund të muajit në Galerinë e Artit të Tiranës.