DEBAT MES RAMËS DHE FLORJAN BINAJT PAS KOMENTEVE NË PODCAST-IN “FLASIM”

Në episodin më të fundit të podcast-it të tij “Flasim”, kryeministri Edi Rama komentoi zhvillimet politike në prag të zgjedhjeve lokale, duke u ndalur te kandidatura e aktorit të humorit Florjan Binaj për Bashkinë e Tiranës. Me tone ironike, Rama e përmendi përzgjedhjen e opozitës si një “sfidë humoristike” ndaj Partisë Socialiste, duke kujtuar se dikur Binaj kishte bërë publikun socialist të qeshte me imitimet e tij në emisionin “Portokalli”.

“Opozita ka zgjedhur një aktor humori për Tiranën, që dikur me imitimet për mua shkrinte gazi Kongresin e PS-së,” u shpreh Rama gjatë podcast-it, duke nënvizuar me ironi ndryshimin e roleve mes artit dhe politikës.

Reagimi i Florjan Binajt nuk vonoi. Përmes një postimi në rrjetet sociale, aktori iu përgjigj kryeministrit me tone të ashpra dhe thumbuese, duke e cilësuar Ramën si “aktorin më të madh të Shqipërisë”.

“Aktori më i madh në Shqipëri është Edi Rama, që u merr 140 milionë euro qytetarëve duke ‘i bindur’ se po bën incenerator pa vënë asnjë tullë! Prestigjator,” shkroi Binaj në reagimin e tij, duke e akuzuar kryeministrin për mashtrime ndaj publikut.

Kandidatura e Binajt për Bashkinë e Tiranës ka ngjallur interes të gjerë në opinionin publik, duke sjellë përplasje të hapura mes botës politike dhe asaj artistike. Debati është intensifikuar veçanërisht pas komenteve të fundit të Ramës, i cili ka përdorur shpesh ironinë për të vënë në lojë zgjedhjet e opozitës në kryeqytet, ndërsa fushata elektorale pritet të marrë një ton edhe më të nxehtë në javët në vijim.