LAMINE YAMAL BLEn VILËN e SHAKIRËS DHE PIQUE – NGA LEGJENDAT NË DUART E YLLIT TË RI TË BARÇËS

Ylli i ri i Barcelonës, Lamine Yamal, po hyn me stil në elitën e futbollit dhe të luksit spanjoll. Sipas mediave prestigjioze El País dhe El Periódico, 18-vjeçari është bërë pronari i një prej pronave më ikonike të Spanjës – vilës ku dikur jetonin së bashku Shakira dhe Gerard Piqué.

Rezidenca ndodhet në lagjen ekskluzive Ciutat Diagonal në Esplugues de Llobregat, një zonë e njohur për privatësinë, sigurinë dhe fqinjësinë me emra të tjerë të mëdhenj të Barcelonës, si Alejandro Balde dhe Ronald Araujo. Vila vlerësohet në rreth 14 milionë euro dhe shtrihet në një truall prej 3,800 metrash katrorë. Ajo përfshin tre shtëpi të ndara, pishina të brendshme e të jashtme, palestër, hapësira relaksi dhe ambiente luksoze që pasqyrojnë standardin e yjeve të futbollit dhe showbiz-it.

Yamal, që po përjeton një rritje marramendëse në karrierën e tij me Barcelonën dhe Kombëtaren Spanjolle, planifikon ta shndërrojë ish-shtëpinë e çiftit të famshëm në një rezidencë moderne sportive. Projekti i ri pritet të përfshijë një palestër private të nivelit profesional, hapësira për rikuperim dhe terapi fizike, trajner personal dhe një sistem sigurie të avancuar – një strehë e përsosur për një atlet të elitës që kërkon ekuilibrin mes performancës dhe luksit.

E projektuar në vitin 2012 nga arkitektja Mireia Admetller, vila dikur përfaqësonte ëndrrën familjare të Shakirës dhe Piqué-t, në kulmin e karrierës dhe famës së tyre. Tani, historia e saj po shkruhet sërish – këtë herë nga Lamine Yamal, adoleshenti që po ndriçon futbollin europian dhe po futet në botën e të rriturve me një blerje që simbolizon suksesin, stilin dhe ambicien e brezit të ri të yjeve të Barcelonës.