Propozim martese gjatë koncertit të Alban Skënderajt

Koncerti i Alban Skënderajt, i mbajtur mbrëmë në sallën “1 Tetori”, u shoqërua me një moment të veçantë që tërhoqi vëmendjen e publikut. Gjatë interpretimit të këngës “Obsesion”, në sallë ndodhi një propozim martese që u prit me entuziazëm nga të pranishmit.

Një vajzë, e cila po ndiqte koncertin së bashku me partnerin dhe miqtë e saj, u kthye pas pasi u thirr nga shoqja që e shoqëronte. Aty pa partnerin e saj të gjunjëzuar, me një unazë në dorë, i cili i bëri propozimin për martesë.

Foto nga Telegrafi

Reagimi i publikut ishte i menjëhershëm, me brohorima dhe duartrokitje që shoqëruan momentin. Vajza pranoi propozimin dhe mori unazën, ndërsa çifti shkëmbeu një puthje, duke bërë që situata të kthehej në një nga çastet më të përfolura të mbrëmjes.

Ngjarja shtoi një element të papritur romantik në koncertin e Skënderajt, i cili njihet për atmosferën emocionale që krijon në performancat e tij live.