Qeveria Meloni miraton ligj të ri për edukimin seksual, opozita e quan regresiv

Qeveria e ekstremit të djathtë e kryeministres italiane Giorgia Meloni ka miratuar një projektligj të ri që kufizon edukimin seksual në shkolla, duke kërkuar pëlqim me shkrim nga prindërit për çdo aktivitet të tillë. Vendimi është justifikuar nga kabineti qeveritar si pjesë e përpjekjeve për të luftuar atë që ata e quajnë “ideologji gjinore”.

Projektligji ka ngjallur kritika të forta nga opozita dhe grupet e të drejtave civile, të cilët e konsiderojnë masën si një hap prapa për sa i përket të drejtave të grave dhe mbrojtjes së të rinjve. Sipas tyre, kufizimet e reja dëmtojnë programet që synojnë parandalimin e dhunës me bazë gjinore dhe reduktojnë qasjen e nxënësve ndaj informacionit të saktë dhe të sigurt.

Aktivistët theksojnë se qeveria po përforcon një narrativë konservatore që e lidh edukimin seksual me propagandë politike, ndërsa organizatat arsimore paralajmërojnë se rregullat e reja mund të krijojnë pasiguri dhe të pengojnë shkollat në zhvillimin e programeve edukative.

Megjithatë, pavarësisht rezistencës politike dhe ndikimit të fuqishëm të kishës në debatin publik, sondazhet tregojnë se shumica e nxënësve dhe prindërve italianë mbështesin futjen e edukimit seksual në shkolla dhe e shohin atë si të domosdoshëm për formimin dhe sigurinë e të rinjve.