Golden Globes 2026: Gjithçka gati për nominimet, prezantues të rinj dhe kategori të re

Ceremonia prestigjioze e “Golden Globes 2026” është vetëm një muaj larg, me eventin që do të mbahet më 11 janar, por ndërkohë pritet momenti i shumëkomentuar — shpallja e të nominuarve.

Këtë vit, këtë detyrë do ta kenë Marlon Wayans, ylli i serialit Him, dhe aktorja Skye P. Marshall, e njohur nga Matlock. Dyshja do të bëjë publik listën e gjatë të filmave, serialeve dhe artistëve që do të garojnë për çmimet e edicionit 2026.

Në këtë ceremoni do të rikthehet në skenë edhe prezantuesja Nikki Glaser, e cila vitin e kaluar u vlerësua për stilin e saj të guximshëm dhe humorin e drejtpërdrejtë.

Golden Globes këtë vit vijnë me një risi të rëndësishme: një kategori e re e dedikuar për podkastet, e cila pritet të zgjerojë ndikimin e çmimeve në botën e medias dhe storytelling-ut modern. Kandidaturat e mundshme për këtë kategori u zbuluan më herët dhe kanë zgjuar interes të madh.

Gjithashtu, shfaqja e madhe do të nderojë dy emra të rëndësishëm të industrisë. Helen Mirren do të marrë çmimin prestigjioz Cecil B. DeMille, ndërsa Sarah Jessica Parker do të vlerësohet me Carol Burnett Award, një nga nderimet më të mëdha për kontribut në televizion.

Me pritshmëri të larta dhe me disa surpriza të paralajmëruara, Golden Globes 2026 pritet të jetë një nga edicionet më të komentuara të viteve të fundit.