Idris Elba zbulon planet për t’u larguar nga aktrimi: “Dua të kaloj plotësisht në regji”

Idris Elba, një nga aktorët më të suksesshëm të dekadës së fundit, ka surprizuar fansat me deklaratat e fundit gjatë premierës së filmit të tij të ri të shkurtër “Dust to Dreams”, mbajtur në Arabinë Saudite. Ndërsa promovonte projektin e tij të dytë si regjisor — pas filmit “Yardie” — Elba foli hapur për të ardhmen e tij në Hollywood, duke lënë të kuptohet se aktimi nuk do të jetë gjithmonë në qendër të karrierës së tij.

Me filma që kanë gjeneruar mbi 9.8 miliardë dollarë në total, Elba renditet ndër 20 aktorët me fitimet më të larta në histori. Megjithatë, pavarësisht këtij suksesi të jashtëzakonshëm, ai pranon se zemra e tij po e tërheq drejt një drejtimi tjetër.

“Shpresoj që fansat e mi të aktrimit të mos zemërohen me mua, por përfundimisht dua të kaloj plotësisht në regji,” u shpreh 53-vjeçari, duke shtuar se aktrimi ka qenë një kapitull i bukur, por regjia i ofron liri më të madhe krijuese. “Kam aktruar për një kohë të gjatë. Ende e dua, por mendoj se regjia më lejon të jem pak më ndryshe dhe të përjetoj sheshin e xhirimeve në një mënyrë tjetër. Më pëlqen shumë.”

Gjatë intervistës, Elba zbuloi edhe një anë më pak të njohur të tij, duke thënë se shpesh ndihet si “mashtrues” në praninë e politikanëve dhe figurave publike. Ai pranoi se në situata të tilla ndihet i pasigurt dhe madje po mendon të rikthehet në arsim për të forcuar njohuritë e tij politike.

Deklaratat e tij kanë nxitur diskutime të shumta online, me shumë fansa që mbështesin ambiciet e tij të reja dhe mezi presin projektet e radhës që Elba do të sjellë si regjisor. Nëse plani i tij realizohet, Hollywood-i mund të humbasë një nga aktorët më karizmatikë të brezit të tij — por mund të fitojë një regjisor të jashtëzakonshëm.