Blerina Kalthi live në wave breakfast show: Forcë, rikthim dhe arti që lind nga shpirtin luftëtar

Historitë më frymëzuese shpesh vijnë nga ata që nuk dorëzohen përballë sfidave të mëdha. Blerina Kalthi është një shembull i tillë. Vetëm 9 muaj më parë, pas një beteje të gjatë me kancerin e gjirit — me 28 seanca kimioterapie, dy transfuzione gjaku dhe palce — ajo nisi të pikturonte me teknikën e veçantë të pikave, një medium krejt i ri për të, të mësuar gjatë trajtimeve shëndetësore nga mësuesja e saj nga Kosova. Çdo pikturë e saj përmban mbi 10,000 pika akriliku, duke pasqyruar durimin, përqendrimin dhe shpirtin luftëtar të artistes.

Për Blerinën, arti është më shumë se krijim; është një rrugë rikthimi dhe forcimi i vetvetes. Përveç pikturave me pika, ajo krijon edhe në gota, filxhanë, personalizime dhe punime me grep, të cilat i ndan me publikun përmes faqes së saj në Instagram, Art Me Zemër.

Sot, një nga veprat e saj më të fundit, “Universi”, është pjesë e ekspozitës “Gratë e Tiranës” në Galerinë Codi, ku Blerina sjell emocion, ngjyra dhe mesazhe shprese. Mesazhi i saj është i thjeshtë, por i fuqishëm:
“O fiton, o humbet. Unë zgjodha të fitoj.”

Ajo beson se secili mund të sfidojë dhimbjen dhe të gjejë forcë tek pasionet, investimi në veten dhe krijimtaria. Historinë e saj frymëzuese Blerina ndau edhe live në emisionin “Wave Breakfast Show” me Ergys Bamci, duke sjellë një mesazh shprese dhe motivimi për të gjithë dëgjuesit.

Historia e Blerinës është një dëshmi e pastër e shpirtit që nuk dorëzohet dhe e fuqisë së artit për të rikthyer shpresën.