Dafina Zeqiri rikthehet me “Merri”: projekti i ri ndez pritshmëritë e fansave

Dafina Zeqiri ka surprizuar publikun me publikimin e këngës së saj më të re, “Merri”, një projekt që fansat e kanë pritur prej kohësh. Kënga, e shoqëruar me videoklip, shënon një rikthim të fuqishëm të artistes në skenën muzikore pas një periudhe të gjatë pa materiale të reja.

Teksti mban firmën e vetë Dafinës, e cila ka bashkëpunuar ngushtë me Rron Krasniqin për të sjellë një narrativë emocionale dhe moderne. Ndërkohë, produkcioni muzikor është realizuar nga Rzon, Egzon dhe Deard Sylejmani, trio që ka kontribuar në krijimin e një tingulli bashkëkohor dhe të rafinuar, në linjë të plotë me stilin karakteristik të Dafinës.

Videoklipi i realizuar nga Sekuencë ofron një estetikë të kuruar dhe imazhe tërheqëse, duke sjellë një atmosferë që pasqyron me ndjeshmëri temën dhe emocionet e këngës. Vizualet e forta dhe produksioni i nivelit të lartë pritet të jenë një nga elementet që do ta bëjnë “Merri” një nga projektet më të komentuar të fundvitit.

Me këtë publikim, Dafina jo vetëm që forcon pozitën e saj si një nga artistet më me ndikim në muzikën shqiptare, por edhe shton pritshmëritë për performancat e saj të ardhshme. Artistja do të mbajë dy koncerte më 25 dhe 26 dhjetor në Prishtinë, ku pritet të sjellë një show energjik dhe të mbushur me atmosferë festive.