Dashuria mbi futbollin? Adeyemi drejt largimit nga Dortmundi për Loredanën

Bota e futbollit dhe ajo e showbiz-it duket se janë ndërthurur sërish, këtë herë me emrin e Karim Adeyemit. Sulmuesi gjerman i Borussia Dortmund thuhet se ka kërkuar largimin nga klubi, jo për arsye sportive, por për shkak të kërkesës së partneres së tij, këngëtares së njohur kosovare, Loredana Zefi.

Edhe pse Adeyemi ka kontratë me Dortmundin deri në vitin 2027, e ardhmja e tij ka qenë vazhdimisht temë diskutimesh prapa skenave. Sipas mediumit gjerman BILD, lojtari i ka bërë të ditur drejtuesve të klubit se dëshiron të largohet në një të ardhme të afërt.

Burime pranë lojtarit bëjnë me dije se arsyeja kryesore lidhet me jetën personale. Loredana Zefi thuhet se dëshiron të jetojë në një qytet të madh evropian, larg Dortmundit, një faktor që ka ndikuar drejtpërdrejt në vendimin e futbollistit.

Pas këtij zhvillimi, Adeyemi ka ndërmarrë hapa konkretë drejt një transferimi të mundshëm. Ai ka ndërruar agjent dhe ka nisur procesin e rinegocimit të kontratës, duke lënë të hapur derën për një largim të bujshëm.

Me një vlerë tregu prej rreth 60 milionë eurosh, sulmuesi gjerman është tashmë në radarët e disa prej gjigantëve të futbollit evropian. Emri i tij është lidhur me klube si Barcelona, Manchester United dhe Juventus, çka e bën këtë histori edhe më tërheqëse për publikun.

Nëse do të triumfojë karriera apo dashuria, mbetet për t’u parë, por një gjë është e sigurt: saga Adeyemi–Loredana pritet të jetë një nga temat më të nxehta të këtij sezoni.