Zelensky shpërthen në Davos: Europa e humbur dhe e pafuqishme përballë luftës

Presidenti ukrainas Volodymyr Zelenskyy ka zgjedhur Forumin Ekonomik Botëror në Davos për të lëshuar një nga deklaratat më të forta politike të muajve të fundit, duke kritikuar hapur mosveprimin dhe pasigurinë e shteteve europiane përballë luftës në Ukrainë. Sipas tij, kontinenti “duket i humbur” dhe vazhdon të sillet në një cikël të pafund përsëritjeje, pa arritur të mbrojë veten dhe pa dhënë mbështetjen e nevojshme për Kievin.

Zelenskyy kujtoi se kishte kaluar një vit nga fjalimi i tij i fundit në Davos, kur paralajmëroi se Europa duhej të mësonte të vetëmbrohej dhe të merrte më shumë përgjegjësi për sigurinë e saj. Megjithatë, sipas presidentit ukrainas, realiteti sot është zhgënjyes, pasi “asgjë thelbësore nuk ka ndryshuar” dhe vendet europiane vazhdojnë të hezitojnë në vendimmarrje.

Në fjalimin e tij, ai theksoi se mbështetja ushtarake ndaj Ukrainës mbetet e kufizuar dhe shpesh e vonuar, duke e bërë vendin e tij të paguajë një çmim të rëndë në fushën e betejës. Po aq kritike ishte edhe deklarata mbi varësinë e vazhdueshme të Europës nga Shtetet e Bashkuara të Amerikës, të cilën Zelenskyy e cilësoi si një shenjë dobësie strategjike dhe mungesë vizioni afatgjatë.

Me tone të ashpra, ai la të kuptohet se pa një ndryshim të qartë në qasjen europiane, rreziku nuk i kanoset vetëm Ukrainës, por vetë sigurisë së kontinentit. Mesazhi i tij nga Davosi tingëlloi si një alarm i drejtpërdrejtë: ose Europa zgjohet dhe vepron, ose do të mbetet peng i frikës, varësisë dhe vendimeve të vonuara.