Pa litar drejt qiellit: momenti kur Alex Honnold sfidoi vdekjen mbi Taipei 101

Në një skenë që dukej më shumë si film aksioni sesa realitet, alpinisti amerikan Alex Honnold u shndërrua në protagonist absolut të së dielës në Taipei, kur vendosi të ngjitej në rrokaqiellin legjendar Taipei 101 pa asnjë litar apo pajisje mbrojtëse. Para syve të një turme të madhe dhe kamerave të Netflix-it, ai nisi ngjitjen e kullës 508 metra të lartë, duke u kapur vetëm pas trarëve metalikë horizontalë.

Brohoritjet shpërthyen që në minutat e para, ndërsa figura e tij me bluzë të kuqe spikaste mes fasadës gri të ndërtesës. Momenti më i paharrueshëm erdhi kur Honnold u ndal në mes të rrugës, u kthye nga poshtë dhe përshëndeti publikun, sikur të ishte në një shëtitje të zakonshme dhe jo në një sfidë ku një gabim i vetëm mund të ishte fatal.

Ngjitja zgjati 1 orë e 31 minuta, një përjetim që vetë alpinisti e përshkroi si të jashtëzakonshëm. “Pamja ishte e pabesueshme. Kishte shumë erë dhe vazhdimisht mendoja se do të bija,” tregoi ai pas mbërritjes në majë, duke pranuar se ekuilibri dhe përqendrimi ishin lufta e vërtetë e asaj dite.

Segmenti më i vështirë ishte ai i mesëm prej 64 katesh, i njohur si “kutitë e bambusë”, që i japin ndërtesës pamjen e saj ikonike. Tetë seksione të pjerrëta, dalje të vështira dhe ballkone të ngushta shndërruan çdo metër në një provë nervash. Megjithatë, për Honnold, frika u kthye në motivim.

Ai shpreson që aventura e tij të frymëzojë të tjerët. “Ndonjëherë njerëzit kanë nevojë vetëm për një shtysë të vogël për të ndjekur ëndrrat e tyre,” tha ai. Edhe prania e turmës ishte një përvojë e re: nga tensioni fillestar, tek ndjenja se të gjithë po i uronin sukses.

Honnold nuk ishte i pari që ngjiti Taipei 101, por ishte i pari që e bëri pa litar. Në vitin 2004, francezi Alain Robert e kishte realizuar ngjitjen me pajisje sigurie, duke lënë Honnold-in të vendoste një rekord të ri dhe tejet të rrezikshëm.

Transmetimi i drejtpërdrejtë në Netflix solli entuziazëm, por edhe debate etike: a duhet të transmetohet live një aktivitet ku rreziku është ekstrem? Një gjë është e sigurt: për disa minuta, gjithë bota mbajti frymën, duke ndjekur njeriun që vendosi të ngjitej drejt qiellit vetëm me guxim dhe duar.