Zelensky hedh “bombën” europiane: Ukraina drejt BE-së në 2027, Hungaria i vë frenat ëndrrës

Presidenti ukrainas Volodymyr Zelensky ka trazuar skenën politike europiane me një deklaratë që tingëllon si një premtim i madh dhe një sfidë e hapur: Ukraina synon të bëhet pjesë e Bashkimit Europian në vitin 2027. Sipas tij, anëtarësimi nuk është thjesht një objektiv politik, por pjesë e një pakete të gjerë garancish ndërkombëtare të sigurisë që do të pasojnë përfundimin e luftës.

Por, ndërsa Zelensky flet për të ardhmen europiane të vendit të tij, prapaskenat në Bruksel janë më pak romantike. Hungaria po luan rolin e “djalit rebel” të BE-së, duke bllokuar hapjen e kapitujve negociues për Ukrainën. Budapesti zyrtar shprehet se pranimi i Kievit në BE do të sillte kërcënime serioze për sigurinë dhe do të rrezikonte stabilitetin ekonomik të unionit.

Në mes të këtij tensioni politik, vjen edhe një sinjal i butë nga korridoret e BE-së. Një zyrtar europian ka konfirmuar se po diskutohet seriozisht mundësia e një integrimi gradual të Ukrainës në Bashkimin Europian – një formulë kompromisi që mund t’i hapë rrugë afrimit, pa shkaktuar përplasje të forta mes shteteve anëtare.

A është viti 2027 një datë reale apo thjesht një slogan politik? Një gjë është e sigurt: rruga e Ukrainës drejt BE-së po kthehet në një telenovelë politike me premtime të mëdha, veto të forta dhe pazare prapa kuintave. Evropës i mbetet të vendosë nëse do ta hapë derën plotësisht, apo vetëm ta lërë paksa hapur.