Ronaldo romantik edhe larg Georginës: dedikimi që ndezi rrjetin dhe surpriza luksoze për ditëlindjen e saj

Cristiano Ronaldo vazhdon të mbetet një ikonë globale jo vetëm për atë që jep në fushën e lojës, por edhe për jetën e tij personale, e cila shpesh kthehet në lajm showbiz-i. Edhe në moshën 41-vjeçare, ylli portugez duket se po jeton një nga periudhat më të qëndrueshme dhe romantike të jetës së tij.

Prej vitesh, Ronaldo ka në krah Georgina Rodríguez, me të cilën ka ndërtuar një marrëdhënie të fortë dhe një familje të madhe. Me rastin e ditëlindjes së 32-të të saj, futbollisti vendosi ta shprehë publikisht dashurinë, duke publikuar një foto në Instagram të shoqëruar me fjalët që prekën fansat: “Gëzuar ditëlindjen gruas së jetës sime”.

Këtë herë, dita e veçantë e Georginës i gjeti partnerët larg njëri-tjetrit. Ajo ndodhet në Shtetet e Bashkuara të Amerikës, ku po merr pjesë në premierën e dokumentarit “Melania”, kushtuar Zonjës së Parë të SHBA-së. Megjithatë, distanca nuk e ndali Ronaldon të tregojë se lidhja e tyre mbetet po aq e fortë.

Romanca e çiftit ka hyrë tashmë në një kapitull të ri. Pas gati një dekade lidhjeje, Cristiano Ronaldo i propozoi martesë Georgina Rodríguez më 10 gusht 2025, duke konfirmuar zyrtarisht atë që fansat prej kohësh e prisnin. Dasma pritet të zhvillohet gjatë këtij viti në Madeira, vendlindjen e futbollistit. Sipas vetë Georginës, ceremonia do të jetë e vogël dhe intime, pavarësisht famës dhe pasurisë së jashtëzakonshme të çiftit.

Ronaldo është baba i Cristiano Jr., ndërsa më pas familja u zgjerua me binjakët Eva Maria dhe Mateo, vajzën Alana Martina dhe më të voglën Bella Esmeralda, duke e kthyer shtëpinë e tyre në një familje të madhe dhe të bashkuar.

Si për ta vulosur ditëlindjen në stilin e tij, Ronaldo nuk kurseu as dhuratën. Georgina mori një orë luksoze ‘Rolex’, vlera e së cilës kap shifrën mbi 40 mijë euro, një detaj që konfirmon edhe një herë jetën mes dashurisë, famës dhe luksit që karakterizon këtë çift super-VIP.