Kim Kardashian dhe Lewis Hamilton, romancë sekrete mes luksit dhe helikopterëve

Thashethemet për një lidhje të mundshme mes Kim Kardashian dhe Lewis Hamilton po marrin gjithnjë e më shumë vëmendje, teksa mediat britanike raportojnë se dyshja po jeton një romancë larg syrit të publikut.

Sipas burimeve, Kim Kardashian, 45 vjeçe, udhëtoi drejt Mbretërisë së Bashkuar për një fundjavë romantike me pilotin e Formula 1 në zonën luksoze të Cotswolds. Ajo mbërriti të shtunën pasdite në Aeroportin e Oksfordit me avionin e saj privat dhe u drejtua drejt resortit ekskluziv Estelle Manor, e shoqëruar nga truprojat.

Lewis Hamilton, 41 vjeç, iu bashkua rreth një orë më vonë, duke mbërritur me helikopter nga Londra. Raportohet se çifti ndau një dhomë në pjesën kryesore të resortit, shijoi një darkë private dhe përfitoi nga shërbimet spa, përfshirë një masazh për çifte.

Një burim për The Sun e përshkroi atmosferën si jashtëzakonisht romantike, duke theksuar se ata shfrytëzuan maksimalisht privatësinë dhe luksin e ambientit.

Pas rreth 24 orësh, Kim dhe Lewis u larguan të dielën në mëngjes, duke shmangur vëmendjen e mediave. Më vonë atë mbrëmje, Kim u pa në Londër gjatë një vizite surprizë në Selfridge’s.

Përfaqësuesit e të dyve nuk kanë reaguar ende, duke lënë fansat dhe mediat në pritje të konfirmimit të një romance që mund të jetë një nga çiftet më surprizë të showbiz-it.