“Iku me një peng”: Rrëfimi i ndjerë i Redon Makashit për të atin, Fitim Makashin

Pak ditë pas ndarjes nga jeta të aktorit të dashur Fitim Makashi, djali i tij, Redon Makashi, ka ndarë një nga rrëfimet më të ndjera publike. I ftuar në Ftesë në pesë përballë moderatores Bieta Sulo, kantautori foli mes emocionesh për humbjen dhe për një peng që, sipas tij, e ka shoqëruar të atin deri në fund.

Fitim Makashi, i njohur për dhjetëra role në kinematografinë shqiptare, shpesh në figurën e njeriut të drejtë dhe pozitiv, u nda nga jeta më 31 janar, duke lënë pas një trashëgimi të çmuar artistike. Por përtej duartrokitjeve të publikut, sipas Redonit, ai nuk mori vlerësimin institucional që mendonte se e meritonte.

“Iku me një peng të madh,” u shpreh këngëtari, duke treguar se i kishte përgatitur personalisht dokumentacionin për një vlerësim zyrtar. Momenti kur panë në televizor listën e 15 personaliteteve të nderuara dhe emri i aktorit mungonte, ishte një goditje e rëndë për të.

Redoni zbuloi se përjashtimi lidhej me një firmë të vetme nga një figurë e lartë, detaj që e ndau për herë të parë publikisht. Një padrejtësi që, sipas tij, e trishtoi thellë aktorin në vitet e fundit të jetës.

Mes dhimbjes, ai riktheu edhe kujtime të bukura, si vitet ’70 në kinemanë “Agimi”, kur shfaqej filmi Prita. Aty, mes emocionit të sallës dhe figurës së të atit në ekran, nisi edhe frymëzimi i tij për artin.

Një rrëfim që shkon përtej humbjes personale – një histori për dinjitetin, vlerësimin dhe pengjet që ndonjëherë mbeten pezull, edhe kur dritat e skenës janë fikur.